Eaglais Ghàidhlig Chaluim Cille (na Ghàidhlig)

Dh’fhaighnich sinne

Eadar 16 A’ Mhàirt agus 6 An Giblean 2022 bha Àrainneachd Eachdraidheil Alba (HES) a’ sireadh bheachdan air a’ mholadh againn ìre clàraidh an togalaich seo atharrachadh bho B gu A agus eadar-theangachadh Gàidhlig a chur ris an t-seòladh clàraidh aige.

Air a togail ann an 1901-04,  ’s e eaglais paraiste fhollaiseach agus mòr-mhaisichte, air a dealbh le Uilleam Tennant agus Fred V Burke, a tha ann an Eaglais Ghàidhlig Chaluim Cille. Chaidh a togail airson coimhearsnachd Ghàidhlig Ghlaschu a fhrithealadh. Tha ùidh shònraichte innte airson a beairteas de mhion-obair cloiche snaighte, taobh a-staigh a tha an ìre mhath slàn, a follaiseachd air aon de phrìomh shràidean Ghlaschu, agus airson a h-ùidh mar fhòcas airson adhradh anns a’ Ghàidhlig.

Gheibhear tuilleadh fiosrachaidh air ar  Heritage Portal.

Thuirt sibhse

Fhuair sinn aon fhreagairt dhan cho-chomhairleachadh nach do thog gearan a thaobh an eaglais a chlàradh. Bha am freagairt aig Urrasairean Coitcheann Eaglais na h-Alba, mar shealbhadairean an togalaich, a’ toirt fainear gu robhas a’ dol a reic an togalaich agus nach robh co-dhùnadh ann fhathast a thaobh ciamar a bhiodh seirbheisean Gàidhlig air an tairgsinn ann an Glaschu no am biodh iad co-cheangailte ri aon thogalach. Chuir na h-Urrasairean cuideachd thugainn tomhais de cheartachaidhean a thaobh teacsa na h-aithisg. 

Rinn Sinne

An dèidh meòrachadh air na beachdan a fhuair sinn tron cho-chomhairleachadh, tha sinn a-nise air an ìre clàraidh aig Eaglais Ghàidhlig Chaluim Cille / St Columba Gaelic Church atharrachadh gu Ìre A. Tha sinn cuideachd air seòladh a’ chlàraidh atharrachadh gu ainm Gàidhlig na h-Eaglaise a bhith na phàirt dheth agus cheartaich sinn dà mhearachd fhìrinneach anns an Aithisg Làimhseachaidh. 

Tha clàr nan togalaichean clàraichte ri fhaighinn air ar Heritage Portal  agus tha an Aithisg Làimhseachaidh dheireannaich cuideachd ri fhaighinn.

Tha ar n-àrainneachd eachdraidheil daonnan ag atharrachadh. Chan eil clàradh a’ cur bacadh air atharrachadh ach tha e a’ leigeil le caractar sònraichte structair a bhith air a ghabhail a-steach nuair a tha atharraichean san amharc.

Chan eil clàradh a’ ciallachadh gu feum Eaglais Ghàidhlig Chaluim Cille / St Columba Gaelic Church fuireach mar a tha i gu bràth no fiùs gu feum i a bhith na h-eaglais gu bràth – faodaidh mòran thogalaichean a bhith air an ath-chleachdadh airson feumannan eadar-dhealaichte.

Gheibh sibh an tuilleadh a-mach mu chlàradh san leabhran againn  Scotland’s Listed Buildings no air an làraich-lìn againn:

• Ciamar a tha am pròiseas clàraidh ag obrachadh?
• Dè tha ann an clàradh?
• Dè tha clàradh a’ ciallachadh dha sealbhadairean?

Tha mion fhiosrachadh  a bharrachd mu phròiseasan Listed Building Consent (LBC) and Conservation Area Consent (CAC) air an làraich-lìn againn a bharrachd air fiosrachadh mu chuir a-steach air a shon.

Tha stiùireadh a bharrachd anns an t-sreath fhoillseachaidhean againn Managing Change .